Framgongd í fjórða ársfjórðingi

Raksturin batnaði, hóast mótvind frá marknaðinum

Rakstrarúrslitið  í fjórða ársfjórðingi 2025 fyri alt Bakkafrost samtakið var 295 milliónir krónur, samanborið við 280 milliónir sama ársfjórðing í fjør.

Tøkan í Føroyum var 23.312 tons og 4.579 tons í Skotlandi, í mun til ávikavist 16.638 tons og 3.840 tons sama tíðarskeið í fjør.

Í viðmerking til úrslitið sigur Regin Jacobsen, stjóri:

“Raksturin hjá samtakinum í fjórða ársfjórðingi var góður, serstakliga orsakað av góðari lívfrøðiliga gongd í Føroyum. Hetta er við til at betra um rakstrarkostnaðin, sum framhaldandi er høgt raðfestur í øllum samtakinum.

Laksaprísurin í árinum var munandi lægri enn væntað – og hevur hetta havt sera stóra ávirkan á inntøkur og avlop felagsins.

Í Skotlandi fegnast vit um áhaldandi framgongdina við at økja framleiðsluna á smoltstøðini í Applecross. Framleiðslan av stórum, dygdargóðum smoltum veksur, og ger hetta Applecross til ein hornastein í okkara skotska virksemi. Vit leggja stóran dent á at tryggja, at framleiðslan veksur støðugt  á ein skynsaman hátt.

Betraða rakstrargongdin er hugalig, nú vit hyggja fram móti 2026, har marknaðarútlitini eru  betri. Eftir eitt tíðarskeið við øktum altjóða útboði av laksi í 2025, batnaði marknaðarstøðan móti endanum av fjórða ársfjórðingi. Vit vænta, at útboðið av laksi verður enn meira avmarkað frá øðrum ársfjórðingi 2026 og frameftir.

Fíggjarliga úrslitið í fjórða ársfjórðingi var tó ikki nøktandi. Tað ávirkaðist munandi av framhaldandi høga altjóða útboðnum av laksi, sum trýsti marknaðarprísirnar niður stóran part av ársfjórðinginum. Harumframt var skotska virksemið í oktober ávirkað av felli á aliøkinum Portree, sum var ein avleiðing av sjúkuni, ið sum áður fráboðað rakti fiskin har í triðjað ársfjórðingi.

Hóast hesar avbjóðingar, heldur Bakkafrost fast við kostnaðarstýring, lívfrøðiligt eftirlit og at tryggja støðugan rakstur. Vit halda fram við at gera strategiskar íløgur, samstundis sum vit varðveita eina varliga og javna tilgongd til vøkstur, fyri at stuðla undir langtíðar burðardygga virðisskapan.”

Roknskapurin fyri  fjórða ársfjórðing 2025 er at finna á heimasíðu felagsins, www.bakkafrost.com

Kelda: bakkafrost.com

Ársfrágreiðingin 2025: Góður rakstur í einum avbjóðandi marknaði

Bakkafrsot 27.03.2026

Bakkafrost hevur almannakunngjørt ársfrágreiðingina fyri 2025. Árið var merkt av einum avbjóðandi marknaði við lágum laksaprísum, men hóast hesar avbjóðingar, megnaði samtakið framhaldandi at styrkja raksturin.

Trygt fíggjarligt grundarlag

Fíggjarliga úrslitið fyri 2025 er prógv um sterku virðisketuna hjá Bakkafrost. Samtakið hevði ein umsetning á DKK 7,0 mia., og rakstrarliga úrslitið (EBIT) var DKK 888 mió. Tøkan í 2025 var 106.823 tons, ið er ein munandi øking frá 90.656 tons í 2024.

Samtakið varðveitti eina sterka fíggjarstøðu, har lutfallið av eginkapitali er 58%. Hetta tryggjar, at samtakið kann fremja tær íløguætlanirnar, sum eru stungnar út í kortið, og samstundis kann samtakið halda fram at gjalda út vinningsbýti til eigararnar. Til aðalfundin í apríl fer nevndin at skjóta upp, at eitt vinningsbýti á 3,45 kr. fyri hvørt partabræv verður útgoldið.

Góð lívfrøðilig gongd

2025 var merkt av sterkari lívfrøðiligari gongd, serliga í Føroyum, har vøksturin var sera góður, fellið var lágt, og lúsatalið áhaldandi var á einum lágum støði. Smoltalingin í Føroyum setti framleiðslumet, har tilsamans 18,7 milliónir smolt vórðu sett út við eini miðalvekt á 453 g.

Í Skotlandi byrjar strategiin við at seta stór smolt á sjógv at geva úrslit, og miðalvektin við tøku hækkaði til 5,3 kg.

Bakkafrost hevur áhaldandi fokus á at tryggja fiskaheilsu og djóravælferð, og í 2025 yvirlivdi í miðal 93% av fiskinum í sjógvalingini. Harumframt slapp eingin laksur hjá Bakkafrost úr nakrari alinót, hvørki í Føroyum ella Skotlandi.

Burðardygd

Gjøgnumskygni og ábyrgd eru framhaldandi kjarnin í virkseminum hjá Bakkafrost. Ársfrágreiðingin lýsir millum annað gongdina í mun til 2030 málini hjá samtakinum um at minka um útlátið av CO2. Útlátið hækkaði í 2025 orsaka av hægri framleiðslu, samstundis sum at Bakkafrost heldur fram við at menna og fremja sína veðurlagsætlan, sum er í samsvari við SBTi-málini. Bakkafrost arbeiðir víðari við grøna orkuskiftinum gjøgnum fleiri átøk og samstarv, har vindmyllulundin Eysturlund framvegis er ein avgerandi partur av ætlanini. Harumframt nýtir Bakkafrost grønan streym í Skotlandi.

Bakkafrost er ein týðandi partur av lokalsamfeløgunum, har millum annað 947 mió. vórðu goldnar í løn til starvsfólkini, 59% av samlaða føroyska innkeypinum í árinum var frá 1.616 ymiskum lokalum veitarum, og stuðul var latin úr Sunt Lív grunninum til ymisk endamál.

Ársfrágreiðingin kann lesast her.

Harumframt hava vit kunngjørt eina samanumtøku á føroyskum, sum kann lesast her.

Kelda & mynd: bakkafrost.com