Fiskiveiða og aling eigur meira enn triðingin av vøkstrinum í lønarkrónum. Hetta kemst serliga av løn í botnfiskiveiðu, sum seinastu 12 mánaðirnar er vaksin við næstan 50 prosentum samanborið við undanfarna tíðarskeið.
860 milliónir krónur, ella 6,6 prosent, fleiri lønarkrónur vórðu útgoldnar í tíðarskeiðinum frá mai 2025 til apríl 2026 samanborið við undanfarnu 12 mánaðirnar.
Løn (útgoldin)
12 mánaðarskeið 2024/25 og 2025/26
| mai – apríl | munur | |||
|---|---|---|---|---|
| 2024-25 | 2025-26 | mió. kr. | % | |
| Løn (útgoldin) | 13.039,4 | 13.898,6 | 859,2 | 6,6 |
Kelda:Hagstova Føroya
Vøksturin í útgoldnum lønum hevur verið støðugur seinastu árini. Hetta sæst á trendinum, sum lýsir gongdina við at reinsa fyri árstíðarfrávik og øðrum tilvildarligum broytingum.
Botnfiskiveiða tilsamans eigur 30 prosent av vøkstrinum
Talvan niðanfyri vísir A-skattaðu lønirnar á ovasta stigi eftir vinnugreinaflokkingini NACE fyri seinastu 12 mánaðirnar samanborið við 12 mánaðir frammanundan. Størsti vøkstur í krónum átti ‘Landbúnaður, skógrøkt og fiskiveiða’. Verður hendan vinnugreinin útgreinað, sæst at vøksturin er serliga stórur í ‘botnfiskiveiðu’, har lønirnar eru vaksnar við næstan 50 prosentum. Verður ‘botnfiskiveiða’ løgd saman við ‘botnfiskiveiðu, sum er virkað umborð’, eru útgoldnu lønirnar tilsamans 260 milliónir krónur størri seinastu 12 mánaðirnar samanborið við undanfarna tíðarskeið. Hetta er á leið 30 prosent av samlaða lønarvøkstrinum seinastu 12 mánaðirnar.
Aðrar vinnugreinar við stórum lønarvøkstri í krónum eru ‘Flutnings- og goymsluvinna’, ‘Heilsu- og Almannaverk’ og ‘Framleiðsluvinna’ við ávikavist 95, 85 og 72 milliónum krónum. Hesi eru ein vøkstur millum 4 og 8 prosent.
Løn (útgoldin), høvuðsvinnugrein hjá arbeiðsgevara
12 mánaðarskeið 2024/25 og 2025/26
| mai – apríl | munur | |||
|---|---|---|---|---|
| 2024-25 | 2025-26 | mió. kr. | % | |
| Tils. (høvuðsvinnugrein hjá arbeiðsgevara) | 13.039,4 | 13.898,6 | 859,2 | 6,6 |
| A Landbúnaður, skógrøkt og fiskiveiða | 1.586,0 | 1.913,0 | 327,0 | 20,6 |
| A.01 Plantu- og húsdjóraaling, veiða og tænastur í hesum sambandi | 12,7 | 13,1 | 0,4 | 2,8 |
| A.03 Fiskiveiða og aling | 1.573,2 | 1.899,9 | 326,7 | 20,8 |
| A.03.1.1.10 Botnfiskiveiða | 399,6 | 594,4 | 194,8 | 48,8 |
| A.03.1.1.15 Botnfiskiveiða, ið er virkað umborð | 204,8 | 270,1 | 65,4 | 31,9 |
| A.03.1.1.20 Uppsjóvarveiða | 548,0 | 593,7 | 45,6 | 8,3 |
| A.03.1.9.90 Onnur fiskiveiða | 19,2 | 21,9 | 2,7 | 14,0 |
| A.03.2.0.00 Aling | 401,7 | 419,9 | 18,2 | 4,5 |
| B Námsvinna og grótbrot | 0,1 | 0,0 | -0,1 | -100,0 |
| C Framleiðsluvinna | 1.269,9 | 1.342,3 | 72,4 | 5,7 |
| C.10 Matvøruframleiðsla | 664,8 | 707,5 | 42,8 | 6,4 |
| C.11-33 Onnur framleiðsla enn matvørur | 605,1 | 634,8 | 29,7 | 4,9 |
| D El-, gass- og fjarhitaveiting | 112,6 | 117,7 | 5,1 | 4,5 |
| E Vatnveiting; kloakkir og ruskviðgerð | 52,5 | 56,9 | 4,5 | 8,5 |
| F Byggivinna | 1.118,8 | 1.105,6 | -13,2 | -1,2 |
| G Heil- og smásøla; umvæling av akførum | 1.091,6 | 1.158,6 | 67,0 | 6,1 |
| H Flutnings- og goymsluvinna | 1.242,5 | 1.337,9 | 95,4 | 7,7 |
| I Gisting og matstovuvinna | 249,8 | 269,2 | 19,4 | 7,8 |
| J Kunning og samskifti | 368,4 | 389,2 | 20,8 | 5,6 |
| K Fígging og trygging | 401,2 | 410,9 | 9,7 | 2,4 |
| L Søla, útleiga og umsiting av fastognum | 26,6 | 32,4 | 5,7 | 21,6 |
| M Serkøn, vísindalig og tøknilig tænastuveiting | 453,3 | 482,4 | 29,1 | 6,4 |
| N Umsitingarligar o.l. tænastuveitingar | 205,2 | 224,0 | 18,8 | 9,1 |
| O Almenn umsiting og verja; lógarkravdar almannaveitingar | 1.808,0 | 1.876,0 | 68,0 | 3,8 |
| P Undirvísing | 856,0 | 879,5 | 23,5 | 2,7 |
| Q Heilsu- og almannaverk | 1.878,6 | 1.963,9 | 85,2 | 4,5 |
| Q.86 Heilsuverk | 746,4 | 782,7 | 36,3 | 4,9 |
| Q.87 Røktarvirksemi á bústovnum | 1.071,1 | 1.122,8 | 51,8 | 4,8 |
| Q.88 Almannatiltøk uttan fyri stovnarnar | 61,2 | 58,3 | -2,9 | -4,7 |
| R List, undirhald og ítróttir | 177,7 | 196,5 | 18,7 | 10,5 |
| S Aðrar tænastuveitingar | 133,4 | 135,6 | 2,2 | 1,7 |
| T Húsarhald við starvsfólki; framleiðsla til egna nýtslu | 0,0 | 0,0 | 0,0 | – |
| U Virksemi hjá altjóða felagskapum | … | … | – | – |
| X Virksemi ikki upplýst | 0,0 | 0,0 | 0,0 | – |
Kelda:Hagstova Føroya
Menn eiga størra partin av lønini og vøkstrinum
Av útgoldnu lønini á 13,9 milliardir krónur seinastu 12 mánaðirnar, áttu menn 62 prosent við 8,6 milliardum krónum.
Av vøkstrinum á 860 milliónir krónur seinastu 12 mánaðirnar, áttu menn størra partin við 70 prosentum ella 600 milliónum krónum.
Býtt á geira, áttu menn, ið arbeiða hjá arbeiðsgevara undir privatum ræði, størsta vøkstur. Teir áttu meira enn helvtina av vøkstrinum við knøppum 520 milliónum krónum, sum er ein vøkstur á 8,7 prosent, tá samanborið er við undanfarna tíðarskeið.
Kvinnur, ið arbeiða hjá arbeiðsgevara undir almennum ræði, høvdu næst størsta vøksturin í krónum við næstan 150 milliónum krónum, sum er vøkstur á 4,3 prosent. Kvinnur undir privatum ræði høvdu tó lutfalsliga størri lønarvøkstur við 6,8 prosentum.
Løn (útgoldin), kyn, undir privatum ræði ella almennum ræði
12 mánaðarskeið 2024/25 og 2025/26
| mai – apríl | munur | |||
|---|---|---|---|---|
| 2024-25 | 2025-26 | mió. kr. | % | |
| Tilsamans | 13.039,4 | 13.898,6 | 859,2 | 6,6 |
| Kvinnur | 5.073,7 | 5.331,8 | 258,1 | 5,1 |
| Menn | 7.965,7 | 8.566,8 | 601,1 | 7,5 |
| Undir privatum ræði | 7.624,8 | 8.255,3 | 630,5 | 8,3 |
| Kvinnur | 1.631,7 | 1.743,3 | 111,6 | 6,8 |
| Menn | 5.993,0 | 6.512,0 | 518,9 | 8,7 |
| Undir almennum ræði | 5.414,6 | 5.643,3 | 228,7 | 4,2 |
| Kvinnur | 3.441,9 | 3.588,5 | 146,5 | 4,3 |
| Menn | 1.972,7 | 2.054,8 | 82,1 | 4,2 |
Viðm.:Sí niðast fyri lýsing av ræði.Kelda:Hagstova Føroya
Størsti lønarvøkstur í Sandoyar øki
Niðanfyri sæst prosentmunur í útgoldnum lønum seinastu 12 mánaðirnar samanborið við undanfarna tíðarskeið býtt á bústaðarøki. Búsitandi í Sandoyar øki hava havt størsta vøkstur við 12,7 prosentum. Norðurstreymoyar øki hevði minsta vøkstur við 4,9 prosentum. Løntakarar búsitandi uttanlands eru ikki á kortinum. Hjá teimum er útgoldna lønin 2,3 prosent hægri í mun til undanfarna tíðarskeið.
Meira útgreinaði lønarhagtøl um øki eru á økissíðunum: Norðoya øki, Eysturoyar øki, Norðstreymoyar øki, Suðurstreymoyar øki, Vága øki, Sandoyar øki, Suðuroyar øki.
Um lønarhagtølini
Løn sum hagfrøðiligt hugtak er partur av tí breiðu allýsingini av viðurlagi til starvsfólk. Viðurlag er tvíbýtt í a) løn og b) ískoyti hjá arbeiðsgevarum til sosialar skipanir, herundir pensjón. Hugtøkini byggja á allýsingina í tjóðarroknskaparhandbókunum ‘System of National Accounts’ hjá ST og ‘European System of Accounts’ hjá Eurostat.
Eftir hesi allýsing fevnir løn um lønarpartar so sum grundløn, viðbøtur, yvirtíðargjøld, frítíðarløn, starvsfólkaágóðar, men ikki um sosial gjøld hjá arbeiðsgevaranum so sum eftirløn, arbeiðsloysistrygging og barsilsgjald.
Hagtølini um lønir fevna bert um løn í peningi, ið verður goldin av einum arbeiðsgevara til eitt starvsfólk um samtíðarskattaskipanina. Tískil fevna lønir bara um A-skattskyldugar inntøkur frá arbeiðsgevarum, ið eru búskaparliga virknir í Føroyum. Allar lønir, sum lúka oman fyri nevndu krøv, telja við, uttan mun til um starvsfólkið er búsitandi í Føroyum ella uttanlands.
Orðalýsingar:
- “Undir privatum ræði” fevnir um “Ikki-fíggjarlig feløg, fíggjarlig feløg, húsarhald og felagsskapir undir privatum ræði” + “Ikki-fíggjarlig feløg, fíggjarlig feløg, húsarhald og felagsskapir undir útlendskum ræði”
- “Undir almennum ræði” fevnir um “Almenn fyrisiting og tænasta” + “Ikki-fíggjarlig feløg, fíggjarlig feløg, húsarhald og felagsskapir undir almennum ræði”
Kelda og mynd inni á greinini Hagstovan. Framsíðumynd 24.fo
