Fríggjadagin í farnu viku vóru borgarstjórin Elsa Berg og tekniski stjórin Fríður P. Dalsgarð í Nólsoy, har tey fingu eitt prát við staðbundnu nevndina um ruskplássið í bygdini.
Ruskplássið treingir til ábøtur, og til dømis er eingin serlig bingja til papp, so tað ber ikki til at skilja alt ruskið á sama hátt sum flestu aðrastaðni í landinum.
Nólsoyingar kundu eisini hugsað sær, at tað bleiv lættari at sleppa av við ruskið. Ruskplássið er opið tríggjar tímar tvær ferðir um vikuna, men tað er ikki altíð, at tað liggur fyri hjá bygdafólkinum at fara við ruski, tá ruskplássið er opið, serliga hjá teimum, sum arbeiða í Havn og aðrastaðni.
Borgarstjórin vitjaði eisini barna- og ungdómshúsið Látrið, sum hevur bæði vøggustovu, barnagarð og frítíðarskúla og eisini virkar sum barna- og ungdómshús.
Í løtuni ganga 6 børn í vøggustovu og 15 børn í barnagarði, sum er lutfalsliga nógv. Harumframt eru 9 skúlabørn, sum eisini ganga í frítíðarskúla, og eini 10-12 ganga í ungdómshúsinum.
Í mai 2025 búðu 215 fólk í Nólsoy.
Kelda & myndir: torshavn.fo
