Runavíkar kommuna: 340 milliónir í fíggjarætlanini fyri 2027 – hægri barnafrádráttur og ongin nýggj lántøka

Runavíkar býráð hevur við fyrstu viðgerð samtykt fíggjarætlanina fyri 2027, sum leggur upp til framhaldandi menning av kommununi, samstundis sum dentur verður lagdur á fíggjarligt varsemi, lægri skuld og góðar umstøður hjá barnafamiljum.

Samlaðu inntøkurnar eru mettar til 340 milliónir krónur, og ætlanin vísir eitt avlop á 22,5 milliónir krónur. Harumframt verða 48,5 milliónir krónur settar av til íløgur, uttan at kommunan ætlar at taka nýggj lán.

Eitt av gleðiligu tíðindunum fyri barnafamiljurnar er, at barnafrádrátturin hækkar úr 10.500 upp í 11.500 krónur. Skattaprosentið verður óbroytt, 21,5 prosent, og frítíðarkortið verður framvegis 3.000 krónur fyri hvørt barn millum 0 og 18 ár.

Íløgur í framtíðina

Runavíkar kommuna hevur seinastu árini framt stórar íløgur í havnir, vegir, ítróttarøki, útstykkingar, ungdómshús og nýggju svimjihøllina. Hesar íløgur hava økt um skuldina, men nú er skuldarparturin minkaður úr 94 niður í 82,5 prosent, og kommunan er 55 milliónir krónur undir skuldarloftinum.

Í 2027 verður framhaldandi raðfest at menna skúlar, frítíðarumstøður, ítrótt, havnir og kommunala undirstøðukervið. Millum størri íløgurnar eru 6,9 milliónir krónur til frítíðarskúla og ítróttarhús í Runavík, 3,5 milliónir til Fjøruvegin og 3,5 milliónir til vatnverk.

Vøkstur og fíggjarligt varsemi

Fólkatalið í Runavíkar kommunu er vaksið við 862 borgarum síðan kommunusamanleggingarnar í 2000-árunum. Hesin vøkstur krevur framhaldandi íløgur í tænastur og undirstøðukervi.

Fíggjarætlanin fyri 2027 leggur sostatt upp til eina gongd, har kommunan bæði kann halda fram við neyðugum íløgum og styrkja sína fíggjarligu støðu.

Talan er um eina fíggjarætlan, sum sameinir menning, trivnað og fíggjarligt varsemi, við serligum atliti at barnafamiljum og framtíðini hjá kommununi.

Fíggjarætlanin skal til aðru viðgerð í býráðnum 26. november 2026.

Hetta skrivar kommunana á teirra heimasíðu runavík.fo:

FÆ2027

05. november 2026

Barnafrádrátturin verður 11.500 krónur. Spjaldrið er ásett til 3.000 krónur fyri hvørt barnið millum 0 og 18 ár og skattaprosentið verður hitt sama sum í 2026 – 21½%.

Á fundi í býráðssalinum á Glyvrum seinrapartin í dag, samtykti býráðið – við fyrstu viðgerð – fíggjarætlanina fyri árið 2027. Harvið eru fíggjarligu lunnarnir undir Runavíkar kommunu lagdir eitt ár fram í tíðina frá ársskiftinum komandi.
 
Tilgongdin hevur sum vanligt verið drúgv fram haðartil, at úrslitið nú varð samtykt við fyrstu viðgerð. Onnur viðgerð verður á býráðsfundinum hósdagin hin 26. november. Kommunalar fíggjarætlanir skulu vera landsmyndugleikanum í hendi fyrst í desember mánaði.
 
Síðan í summar hava fyrisiting og politiskar nevndir virkað við málinum, umframt at evnisdagar hava verið hildnir. Á endaligum evnisdegi í Saltangará – í GOTT – sat býráðið allan seinasta hósdag, í ein hálvan sólarring, og telvaði seg fram til eina semju, sum gjørdist grundarlagið undir FÆ2027.
 
Barnafrádrátturin er hækkaður við túsund krónum – úr 10.500 upp í 11.500 krónur, annars eru ásetingarnar um frítíðarkort og skattaprosent á sama støði sum í verandi ári. Vanligi raksturin hækkar við 5,43%, tá er raksturin av nýggju svimjihøllini tikin við.
 
Nógvar og stórar íløgur eru framdar í verki hesi seinastu árini – m.a. Fjøruvegurin, útstykkingar, nýggj bryggja á Glyvrum, orkubryggja í Søldarfirði, nýgerð á ítróttarøkinum, nýtt ráðhús, ungdómshús og ikki minst svimjihøllin. Væl av fíggjarligari orku er farin til verkætlanirnar, tí var tað øllum greitt, at kommunan fór at nærkast skuldarloftinum, táið mest stóð á. Eftir at skuldin hevur verið uppi á 94%, eru vit nú – eftir at hava repað seglini nakað – komin niður á 82,5% – 55 milliónir krónur niðanfyri skuldarloftið.

Fíggjarætlanin fyri 2027 er eisini løgd soleiðis, at tað ikki er ætlað við lántøku. Meðan fyrisitingarligar og politiskar fyrireikingar vera gjørdar til stórar verkætlanir – á skúlaøkinum, dagstovnaøkinum og í undirstøðuna (Fjøruvegurin) – ræður um hóskiligt varsemi soleiðis, at kommunali búskapurin yvir tíð stendur upp og niður.
 
Inntøkurnar fyri 2027 eru varliga mettar, eisini í mun til hvussu gongdin hevur verið higartil í 2026. Annars ræður tað um, stútt og støðugt, at hava tamarhald á rakstrinum, hann skal helst vera lakari enn inntøkuvøksturin, fyri at peninganøgdin til íløgur heldur stand yvir tíð. Íløgurnar flyta samfelagið fram á leið og eru alneyðugar í einum vakstrarøki.
 
Bæði persónsskatturin – bulurin í kommunala búskapinum – og eftirlønarskatturin hava roynst væl higartil í ár, hóast kommunan brúkar væl meiri enn landsins  afturbering til eldraøkið. Í góðum samvirknaði eiga Sjóvar, Nes- og Runavíkar kommuna Roðan, sum higartil hevur roynst okkara eldru borgarum væl.

Síðan samanleggingarnar í 00´unum er fólkatalið vaksið við 862 borgarum.

Fíggjarkarmurin 2027:

Inntøkur:

Útreiðslur:

Raksturin skipaður á økjum:

Íløgurnar í 2027 lutaðar á økir:

Tórbjørn Jacobsen,
borgarstjóri.