Lagt út ÓML
8,9% av øllum føroysku húskjunum skyldaðu í 2023 meira enn 3 ferðir sína árliga bruttoinntøku. Í 2022 vóru tey 7,5%. Hetta skrivar Landsbankin.
Meginparturin av skuldini hjá føroysku húsarhaldini er skuld til bústaðarlán. Føroysku húsarhaldini høvdu bústaðarlán fyri 13,2 mia. kr. tilsamans í mai 2024. Bústaðarlánini í føroysku bankunum vóru nærum 9,7 mia. kr. og eru økt 13% tað seinasta árið, ímeðan donsku realkredittlánini vóru góðar 3,5 mia. kr.; tey eru minkaði við 7,5% í mun til mai 2023.
Summi húskir eru serliga viðkvom yvirfyri rentuhækkingum. Tað eru húskir við høgum skuldarlutfalli, ið hava sethúsalán við broytiligari rentu og/ella hava sethúsalán uttan avdráttir. Húskir við slíkum sethúsalánum hava í størri mun skulað nýtt ein øktan part av síni tøku inntøku til rentuútreiðslur í hesum tíðarskeiðinum meðan renturnar eru øktar. Í mai 2024 var 89,5% av skuldini hjá føroysku húsarhaldunum við broytiligari rentu og nærum 4% uttan avdráttir.
Í 2023 vóru umleið 300 fleiri húskir í Føroyum, enn í 2022. Verður bert hugt at teimum húsarhaldum, sum hava skuld omanfyri 2 mió. kr. og skylda meir enn 3 ferðir sína ársinntøku, eru tey vorðin 200 fleiri í 2023, enn í 2022.
Burturav hesum 200, vóru tað 100 fleiri húskir í 2023 í mun til í 2022, sum skyldaðu millum 3 og 4 ferðir inntøkuna, 30 fleiri sum skyldaðu millum 4 og 5 ferðir inntøkuna og 70 fleiri, sum skyldaðu omanfyri 5 ferðir inntøkuna. Sí mynd 1.
Á mynd 2 sæst, tað er í teimum hægru skuldarlutføllunum, at skuldin hjá føroysku húskjunum er økt í 2023 samanborið við 2022.
Húsarhaldini læntu sostatt meira í 2023 samborið við sína inntøku, enn tey gjørdu í 2022, hóast rentustøðið er økt. Økta rentustøðið ger, at húsarhaldini í dag noyðast at nýta ein størri part av síni tøku inntøku uppá rentuútreiðslur, enn áðrenn rentan byrjaði at hækka í 2022.
Mynd 1 Skuldarlutfall
Mynd 2. Bruttoskuld
Les meir í frágreiðing landsbankans um fíggjarliga støðufestið frá mai 2024 her.
