Steinar Eirikstoft hevur valt at siga seg úr starvinum sum sjúkrahússtjóri á Landssjúkrahúsinum og forstjóri fyri Sjúkrahúsverkið. Hetta skrivar Heilsumálaráðið.
Steinar ynskir at verða loystur úr starvi 30. november 2025, og Heilsumálaráðið hevur játtað at ganga umbøn hansara á møti. Steinar Eirikstoft hevur starvast í Sjúkrahúsverkinum sum stjóri í meira enn 6 ár, og hevur hann hesi árini verið við til at menna og styrkja raksturin og tænasturnar í Sjúkrahúsverkinum.
Landsstýriskvinnan í heilsumálum hevur avgjørt at seta Per Busk sum virkandi sjúkrahússtjóra á Landssjúkrahúsinum og forstjóra fyri Sjúkrahúsverkið frá 1. desember 2025, og fram til nýggjur stjóri er settur. Per hevur drúgvar royndir sum sjúkrahússtjóri frá Esbjerg og Grindsted Sygehus.
Starvið sum sjúkrahússtjóri og forstjóri verður lýst leyst seinni í ár.
Heilsumálaráðið takkar Steinari Eirikstoft fyri gott samstarv og týðandi arbeiðið í Sjúkrahúsverkinum.
Kelda & mynd: hmr.fo – 23 sept. 2025
