Sirið Stenberg, landsstýriskvinna í uttanríkis- og mentamálum, hevur í dag gjørt av, at Føroyar 1. januar 2026 seta dagførd avmarkandi tiltøk í verk. Dagførdu avmarkandi tiltøkini fevna um persónar og eindir, sum eitt nú vera mett at hava framt gerðir ella hava viðvirka í sambandi virksemi, sum hevur til endamáls at ávirka støðufesti hjá londum í Evropa. Hetta kann til dømis fevna um netálop, uppíblanding í fólkaræðisligar skipanir, njósnaraátøk, álop á kritiskt undirstøðukervi, undir einum nevnt hybridar hóttanir.
Talan er um tiltøk móti likamligum og løgfrøðiligum persónum og eindum, sum eru fevnd av avmarkandi tiltøkunum sambært fyriskipan Evroparáðsins nr. 2024/2642 frá 8. oktober 2024. Noreg setti hesi tiltøk í verk í juli 2025.
Millum tey feløg, ið verða fevnd av dagførdu avmarkandi tiltøkunum, eru russisku feløgini Murman Seafood og Norebo JSC, sum higartil hava havt fiskiloyvi í føroyskum sjógvi sambært fiskiveiðuavtaluni millum Føroyar og Russland. Skip hjá hesum feløgum kunnu hereftir sostatt ikki fáa fiskiloyvi til veiðu í føroyskum sjógvi, eins og skipini ikki kunnu koma í føroyska havn.
Harumframt verða fleiri skip løgd afturat listanum við tanga- og farmaskipum, sonevndi “skuggaflotin”, sum millum annað verður nýttur til at koma uttanum avmarkandi tiltøkini um prísloft á russiskari olju og gassi.
Kunngerðin við tiltøkum, sum koma í gildi 1. Januar 2026, er tøk her.
Kelda & myndir: ummr.fo
