Landsstýrismaðurin á vitjan hjá Hiddenfjord

Landsstýrismaðurin í tilfeingis- og vinnumálum, Eirikur í Jákupsstovu, var fyrrapartin á virkisvitjan hjá Hiddenfjord í Sørvági. Á vegnum vestur varð steðgað við alibrúkið í Bug, har landsstýrismaðurin hitti Atla Gregersen, stjóra, ið greiddi frá brúkinum.

Í Sørvági varð greitt frá virksemi felagsins, virðisgrundarlagi og hvussu Hiddenfjord áhaldandi arbeiðir við at menna burðardyggar loysnir at ala. Nýggja alibrúkið í Bug var eitt úrslit av hesum arbeiðinum. 

Harumframt varð greitt frá marknaðunum, sum felagið selur til, og tí, sum Hiddenfjord ger fyri at minka um útlát í sambandi við flutning. Høvi varð tó eisini nýtt til at umrøða avbjóðingar og hvussu loysnir kunnu finnast.

Landsstýrismaðurin fekk samstundis møguleika til at seta spurningar og umrøða viðkomandi viðurskifti við leiðsluna.

Vitjanin endaði við eini rundvísing á virkinum og hugnaligum práti.

Á myndini eru Eirikur í Jákupsstovu, landsstýrismaður, og Atli Gregersen, stjóri á Hiddenfjord.

_{Tíðindaskriv – tvmr.fo}