Vit endurgeva her brot úr frágreiïng hjá føroya Váðaráð. Hetta skrivar Landsbankin á heimasíðuni og vit endurgeva her brot úr frágreiðingini
Búskaparstøðan er góð; tað er avlop á handilsjavnanum, arbeiðsloysið er lágt (0,9% í apríl 2024), og inflatiónin er lág. Hagtølini fyri kortnýtslu í Føroyum og uttanlands tilsamans vísa, at nýtslan í trimum teimum fyrstu mánaðunum í 2026 hevur verið størri, enn í sama tíðarskeiði árið fyri. Hetta kann millum annað vera orsakað av, at arbeiði er til allar hendur og av lønarvøkstri. Árligi vøksturin í lønargjaldingunum var 6,6% í apríl 2026.
Útlánsvøksturin er framvegis høgur, hóast hann er minkaður síðani november 2025. Útlánsvøksturin stavar fyrst og fremst frá øktum útlánum til privatu vinnuna. Útlánsvøksturin til privatu vinnuna (uttan almennu feløgini), var 16,1 % í apríl 2026, og stavaði millum annað frá øktum útlánum til tilfeingis- og tænastuvinnuna. Bankarnir hava millum annað veitt fígging til vinnugreinar innan fiskivinnu, sjóflutning, gisti- og matstovuvinnu, umframt fastogn. Útlán til privatu vinnuna eru heft við størri váða, enn útlán til almenna geiran.
Váðaráðið hevur hugt at roknskapartølunum hjá bankunum. Avlopið fyri skatt í teimum fýra føroysku bankunum var 719 mió. kr. í 2025. Tað er eitt sindur lægri enn í 2024, tá tað var 792 mió. kr. Trý tey seinastu árini hava útreiðslurnar til umsiting og starvsfólk, umframt nettoinntøkurnar frá ómaksgjøldum, verið nøkulunda javnar, meðan netto rentuinntøkurnar hava verið skiftandi. Eginpeningsavkastið eftir skatt var 14,1 % hjá Føroya Banka, 10,3 % hjá Betri Banka, 7,4 % hjá Norðoya Sparikassa og 5,9 % hjá Suðuroyar Sparikassa.
Váðaráðið fekk harumframt kunning um pensjónssparingina hjá føroyingum. Pensjónssparingin hjá føroyingum var tilsamans 14,2 mia. kr. í 2024, harav 11 mia. kr. vóru í føroyskum bankum og pensjónsfeløgum; 74 % (8,3 mia. kr.) eru í føroyskum pensjónsfeløgum, og 26 % (2,7 mia. kr.) í føroyskum bankum. Umleið helvtin av pensjónssparingunum í bankunum er sett í virðisbrøv, meðan hin helvtin stendur sum innlán.
Kelda:landsbankin.fo – Tilvildarlig savnsmynd Tórshvn
