Við ársbyrjan búðu 54.684 fólk í Føroyum. Fólkatalið vaks við 292 fólkum, ella einum hálvum prosenti, í 2024. Vøksturin var minni enn í 2023, tá hann var 0,7%. Hetta skrivar Hagstovan.
Fólkavøksturin, sum tók dik á seg í 2014, náddi toppin á sumri í 2019, tá umleið 900 fólk løgdust afturat í einum 12-mánaðarskeiði. Síðan tá er fólkavøksturin spakuliga minkaður, og nú tykist stígur vera komin í. Síðani juni í fjør hevur fólkavøksturin fyri hvørt tólv mánaða tíðarskeið ligið um eitt hálvt prosent.
