Lagt út ÓML
Vesturlendsk hagtøl vísa, at bert eini 15-20% av fólki hava lyndi, hug og dirvi til at royna seg sum íverksetarar.
Tey vága nógv og tveita seg út í eina óvissa tilveru uttan ‘inntøkutrygd’.
Eg havi sjálv verið sjálvstøðug vinnurekandi síðani eg var 21 ár (í 10 ár). Tó síðani eg byrjaði at lesa og varð mamma, valdi eg ta meira tryggu leiðina (sum skrivari hjá Fólkaflokkinum) og havi mítt sjálvstøðuga virki við síðurnar av.
Eini 85% av fólki, vísa somu hagtøl, hava sonevnt ‘funktionerlyndi’. Vit velja ‘inntøkutrygd’ í almennum ella privatum starvi við sáttmálaløn fram um persónligt (men ofta ótrygt og strævið) ‘frælsi´ uttan trygdarnet undir sær.
Politikkur snýr seg, sum vera man, um at stuðla okkum, sum velja nevndu trygd við avmarkingum í inntøku millum hægstu og lægstu lønarkarmar.
Kann skoyta uppí her, at altjóða sonevndi ‘Gini-koefficienturin’ prógvar, at Føroyar við vísitalinum 22, hevur minsta mun millum hægstu og lægstu inntøkubólkar av heimsins 190 londum.
Summir íverksetarar klára seg betur úti í fríu vinnuni enn onnur. Hesi seinnu mugu so royna aftur ella okkart annað.
Tað er ikki pláss fyri okkum øll í tryggum almennum starvi við fastari løn.
Okkum tørvar so inniliga nógv fólk, ið bróta trygdar-sonu og royna seg í vinnulívinum, tí tey og teirra starvsfólk gjalda 60% av skattainntøkunum hjá landi og kommunu.
Okkara nýggju og smærri íverksetarar, fleiri 100 í tali, hava fyri neyðini at hava somu skattligu og sosialu treytir sum meirilutin av landsins inntøkutryggjaðu veljarum hava.
Fólkaflokkurin raðfestir sjálvstøðug vinnurekandi í valskránni. M.a ynskja vit at:
– Tryggja vinnurekandi og íverksetarum vinnuvegleiðing og hjálp til egið virki. Her verður serliga hugsað um hjálp og vegleiðing í samskiftinum við myndugleikarnar.
– Færri fíggjarligar byrðar verða lagdar á sjálstøðug vinnurekandi og smærri fyritøkur, soleiðis at teirra vøkstur ikki er avmarkaður.
– Sjálvstøðug vinnurekandi skulu vera betri stillaði ímun til barsilsskipanina.
– Kringvarpsgjaldið til fyritøkur skal takast av.
Veljið Fólkaflokkin.
X við Monu Breckmann Wescott
