Ókeypis at hava børn á stovni í desember

Foreldur við børnum á dagstovnum í Tórshavnar kommunu fáa ein fíggjarligan lætta í jólamánaðinum, tí kommunan hevur gjørt av at strika dagstovnagjaldið fyri desember.

Fíggjarliga hevur tað gingið væl hjá kommununi í ár, og avgjørt er at geva barnafamiljum ein ágóða av hesum. Tí verður dagstovnagjaldið hjá foreldrum, sum hava børn í vøggustovu, barnagarði, forskúla ella frítíðarskúla, strikað í desember.

“Vit vóna, at hetta fer at lætta um hjá barnafamiljum í jólamánaðinum, tá tað ofta er nógv annað at gjalda,” sigur Elsa Berg, borgarstjóri.

Tað kostar kommununi 4,2 mió. krónur at strika dagstovnagjaldið í ein mánað. Hetta verður fíggjað við meirinntøkum, sum kommunan hevur havt í ár.

Tórshavnar kommuna arbeiðir eisini við skipanarligum broytingum á dagstovnaøkinum. Millum annað er ætlanin frá komandi ári at minka barnabólkarnar á stovnunum, og byrjað verður við vøggustovunum.

_{Kelda & mynd: torshavn.fo}